සිකුරු තරුවෙ නුඹත් ගිහින් මීටරයක් දුරින් ඉඳින්

අත් පටලන් වෙරල දිගේ ඇවිදපු උන් කොහේ ගිහින්
තරඟෙට වගෙ ගෙදර දුවන නර පණුවෝ විසිර ගිහින්
පාළු පාරෙ බැබලෙන්නට ඉරටත් පාළුයිලු ඉතින්
සිකුරු තරුවෙ නුඹත් ගිහින් මීටරයක් දුරින් ඉඳින්

~පුරූ~

ඒ ගඟම ගලන හැටි

කාත් කවුරුවත් නොදන්න ඉසව්වක
ඒ ගඟම ගලන හැටි පුදුමය
අමාරුම තැනුත් පහුකර උල් හදවත්
ගල් බෝල වෙනවා නියතය
හැංගී හැංගි ඔත්තු බලමින් සින්දු කියනා
මාළුවෝ නම් අල්පය
ඉවුර දෙපසේ කරඹ ගස්වල පිපුණු මල් දෙකක්
ගඟට වැටී හමුවීම වේ ආදරය
-කට්ටා / උද්‍යාන් සම්පත් අමේෂන් ජයසේකර/ ඒ ගඟම ගලන හැටි-

...........................................................................

කාත් කවුරුත් දන්න ඉසව්වෙම ඒ ගඟ ගලනවා කාටත් නොපෙනිම
උල් උල් හදවත් තාමත් නොදුටුව මදහස නංවා පාමින් කෝමල
හැංගී හැංගී ඔත්තු බලන්නට ඉස්ගෙඩියක්වත් හමුවුනු නැති තැන
පාර බලන් හිටි වියළි කරඹ මල ආන්න යනවා තනිවම ගහගෙන
 ~පුරූ~

නිරිඳු වෙමි මම

නිරිඳු වෙමි මම
අසම සම වන..
දිනූ පින්බිම පාමුලෙහි සිට
දිනූ හිත් මල සියොළඟම සිට
අනෙක් දිනුමක් කුමකටද තව.....
~පුරූ~

සේයාරුව: චරන උඩුගම

Already reserved?

හිමිද නැතිද නොදැන මාත්
හීන ලෝක මැව්ව උනත්
ඒ හීනේ පෑරෙන වග
හිතන් හිටියේ නෑ

අඟල් දෙකක් උසට මවපු
හීනෙ ටිකක් හීරුණාම
මේ තරම්ම වේදනයිද
දැනන් හිටියේ නෑ

පෝය ගනන් නොපෑයුවම
අමාවකේ තනි උනාම
කවදාවත් මේ වාගේ
දුකක් දැනිලා නෑ

බැබලි බැබලි ඉන්න හඳක්
කෙස් ගහකින් මුවා වෙලා
මේ තරමට දවන බවක්
දැනන් හිටියේ නෑ

~ පුරූ ~

ඔහොම කීවට නුඹත් අද හෙට මටත් නොකියම යන්න යාවිද

පස්සෙ බලමුයි කියා කීවත්
කවදා වෙනකන් මග බලාවිද
එපා කියතැයි හිතා හිටියත්
එපා...මයි මට යයි කියාවිද
සිකුරු ලබලා ළඟම ඉන්නා
සිකුරු තරුවට හාද වේවිද
ඔහොම කීවට නුඹත් අද හෙට
මටත් නොකියම යන්න යාවිද

~පුරූ~